Uzumda qoldiqni rejalashtirish: tovar tugab qolmasligi uchun formula
Ikki xil xato bor: tovar tugab qoladi (sotuv ketadi) yoki ortiqcha yig'ilib qoladi (pul qotadi va saqlash pullik bo'ladi). Qoldiqni rejalashtirish ikkalasini ham oldini oladi.
1. Qoldiq necha kunga yetadi
Qoldiq (kun) = qoldiq ÷ kunlik o'rtacha sotuv
Kunlik sotuvni oxirgi 14–30 kun bo'yicha oling: bitta rekord kunga emas, o'rtachaga tayaning. Omborda 300 dona, kuniga 10 dona sotilsa — 30 kunlik qoldiq.
2. Qayta buyurtma nuqtasi
Qachon yangi partiya buyurtma qilish kerakligini ko'rsatadi:
Nuqta = kunlik sotuv × (yetkazib berish kunlari + Uzumga topshirish kunlari) + xavfsizlik zaxirasi
Misol: kuniga 10 dona; ta'minotchidan 12 kun, tayyorlash va ombor qabuli 6 kun; zaxira — 7 kunlik sotuv (70 dona). Nuqta = 10 × 18 + 70 = 250 dona. Qoldiq 250 ga tushganda — buyurtma berish vaqti.
3. Xavfsizlik zaxirasi
- Sotuv barqaror, ta'minotchi ishonchli: 5–7 kun.
- Sotuv o'zgaruvchan yoki ta'minotchi kechiktiradi: 10–14 kun.
- Mavsumiy tovar: ta'minot muddatini oldindan ikki baravar oling.
4. Yuqori chegara: ortiqcha qilmang
Uzumda aylanma 60 kundan oshsa saqlash pullik (qoidalar). Shuning uchun partiya hajmini shunday tanlangki, qoldiq 60 kundan ko'p yig'ilmasin: kuniga 10 dona bo'lsa — omborda 600 donadan oshmasin.
5. SKU larni bo'ling
Hamma tovarga bir xil e'tibor shart emas. Eng ko'p tushum beradigan SKU larni haftada, qolganlarini oyda bir marta tekshiring. Bunda ABC tahlili yordam beradi.
Tugab qolishning narxi
Tovar tugasa, siz faqat sotuvni emas, kartochkaning qidiruvdagi o'rnini ham yo'qotishingiz mumkin: yana to'ldirganda uni qayta ko'tarish uchun vaqt va reklama kerak. Shuning uchun ko'p sotiladigan SKU da zaxira kamaymasligi kerak.
MARGN do'kon kabineti qoldiq necha kunga yetishini, tugayotgan va ortiqcha SKU larni ko'rsatadi — Ombor va naklandnoy. Postavka qoidalari haqida — Omborga yetkazish.
